Молитва святителю новгородскому евфимию

Детальное описание из нескольких источников: «молитва святителю новгородскому евфимию» - в нашем некоммерческом еженедельном религиозном журнале.

Молитва святителю новгородскому евфимию

Возбранный воеводо и пастырю священнейший великаго Новаграда, иноков наставниче и ангелов собеседниче, скорый помощниче и молитвенниче наш святителю Евфимие, приими усердно приносимая тебе сия богохваления и твоими молитвами от всяких нас бед свободи, да зовем ти:

Радуйся, отче Евфимие, святителю предивный.

Ангельски на земли отче пожил еси, с плотию яко безплотен Евфимие. Темже со безплотными на небеси водворяяся, от нас земных приими песнь сию:

Радуйся, от чрева матерня очищенный.

Радуйся, благодатию Святаго Духа освященный.

Радуйся, рождеством твоим неплодие родителей разрешивый.

Радуйся, скорбь их в радость преложивый.

Радуйся, неплодныя матере чудное прозябение.

Радуйся, священника Господня благодатное процветение.

Радуйся, благаго корене отрасле пречестная.

Радуйся, прекрасный цвете Божия насаждения.

Радуйся, от младенчества рукою Всевышнаяго знаменованный.

Радуйся, от пелен в служение Ему избранный.

Радуйся, по рождестве твоем всемощному покрову Заступницы Мира врученный.

Радуйся, от Нея на добродетель наученный

Радуйся, отче Евфимие, святителю предивный.

Видя Господь слезы и воздыхания твоих благочестивых родителей, слыша моления их, неплодия узы разрешив, плод благославный дарова им тя, преподобне отче, во умилении сердца зовущих: Аллилуиа.

Разум богомудрый стяжав в души твоей, святе Евфимие, измлада суеты мирския уклонился еси, пустынное же возлюбил еси житие, дом родителей оставив, во обители святителя и чудотворца Николаа, яже на Вяжищи, вселился еси, к подвигом иноческим усердно устремился, таковому твоему богомудрию дивящеся, похвалы тебе сия восписуем:

Радуйся, сладости и утехи мира сего презревый.

Радуйся, горняго любомудрия возжелевый.

Радуйся, просветивый измлада ум твой изучением писаний Божественных.

Радуйся, пленивый волю твою в послушание закону Господню.

Радуйся, сердце твое от всякия лести душевредныя чисто сохранивый.

Радуйся, разум твой от помыслов суетных очистивый.

Радуйся, яко Отца Небеснаго паче земных родителей возлюбил еси.

Радуйся, яко Христа ради дом отыий оставил еси.

Радуйся, девства и целомудрия усердный хранителю.

Радуйся, иноческаго жития истинный любителю.

Радуйся, подвиги твоими начальника тмы низложивый.

Радуйся, постом и молитвами вся коварства его упразднивый.

Радуйся, отче Евфимие, святителю предивный.

Сила Вышняго осени тя к плодоношению духовному, премудре Евфимие, и образ тя добродетельнаго жития всем показа хотящым наследовати спасение, внегда пети сице: Аллилуиа.

Имея ревность Божественную о спасении твоем, преподобне, потщался еси со страхом и трепетом Господеви послужити; в трудех бо постнических и послушании мнозем жизнь твою провождал еси. Темже и нам в трудех и борении помози, заступниче наш, да всегда благодарно зовем ти:

Радуйся, от юности мудрости прилежавый.

Радуйся, благое иго Христово на себе восприемый.

Радуйся, постническими подвиги вся плотская мудрования умертвивый.

Радуйся, во удручение плоти вериги непрестанно на телеси твоем носивый.

Радуйся, паче всех добродетелей нищету духовную возлюбивый.

Радуйся, вся красная мира сего ни во что же вменивый.

Радуйся, правило христоподражательнаго жития.

Радуйся, образе монашескаго послушания.

Радуйся, яко в труде и подвизе непрестанно пребывал еси.

Радуйся, яко того ради вся душеполезная благая стяжал еси.

Радуйся, во образ ангельский на земли облекийся.

Радуйся, ангельским чином на Небеси ныне соводворяяйся.

Радуйся, отче Евфимие, святителю предивный.

Бурею искушений различных мняше враг многокозненный от добродетельнаго тя жития отвратити, преподобне отче; ты же по словеси Господню молитвою и постом от ног твоих делече отразил еси того, присно моляся и поя: Аллилуиа.

Слышав блаженный Симеон, святитель Новаграда, твое богомудрое житие, отче Евфимие, управителя над всем домом и имением своим тя поставляет яко мудра строителя и верна. Мы же поминающе светлейшыя добродетели твоя, научаемся звати тебе:

Радуйся, верный и добрый слуго Господень.

Радуйся, усердный делателю винограда Христова.

Радуйся, Божественных велений благочестный исполнителю.

Радуйся, создержанием всяким тело твое духу покоривый.

Радуйся, уставов церковных преизрядный рачителю.

Радуйся, на высоту безстрастия возшедый.

Радуйся, истиннаго смирения зерцало.

Радуйся, кротости и незлобия светлый образе.

Радуйся, яко врученный тебе талант мудрости под землею не сокрыл еси.

Радуйся, яко дарования душевная твоими труды преумножил еси.

Радуйся, благий рабе, в радость Господа твоего призванный.

Радуйся, предстателю о нас пред ним непостыдный.

Радуйся, отче Евфимие, святителю предивный.

Боготечною стезею в тихое пристанице спасения устремився, преподобне, молитвам и милостыни, отче прилежал еси, тленное богатство в нетленное прелагая, Христу же зовый: Аллилуиа.

Видеша людие новоградстии тя богоблаженне Евфимие, яко светильника светозарнаго, на свещнице добродетелей дивно сияюща и на святительский престол Великаго Новаграда единодушно тя призывают, ихже благочестное избрание яве и судом Божиим утвердися, жребием данным, таковому промышлению Божию о тебе чудящеся, вопием ти сице:

Радуйся, всенародным множеством на святительсий престол избранный.

Радуйся, Вседержительною Десницею во архиереех утвержденный.

Радуйся, Великаго Новаграда многоименная славо.

Радуйся, обители вяжищския честная похвало.

Радуйся, церковь Божию твоими учении украсивый.

Радуйся, людми, Богом тебе врученными, ко спасению руководивый.

Радуйся, яко о стаде твоем непрестанно попечение имел еси.

Радуйся, яко многия от вечныя погибели избавил еси.

Радуйся, неразумных человеков вразумителю.

Радуйся, скорбных и печальных утешителю.

Радуйся, погибающих надеждо и исправление.

Радуйся, безпомощных заступление.

Радуйся, отче Евфимие, святителю предивный.

Проповедник доброгласный Христова Евангелия показался еси, богоизбранне архиерею Евфимие, сладость Божественную от уст твоих источая, еюже напитавшеся чада твоя, тебе добраго пастыря почитаем, Христу же зовем: Аллилуиа.

Возсиял яко лучезарное солнце на священное возседе седалище, Великий Новград блистанием премудрых учений твоих чудно озарил еси, сего ради зовем ти:

Радуйся, добротами святительства преукрашенный.

Радуйся, архиерею Божий, душею и телесем воистинну преосвященный.

Радуйся, пастырю словесный стада Христова.

Радуйся, премудрый учителю наследия Иисусова.

Радуйся, Пресвятыя Троицы служителю верный.

Радуйся, Духа Святаго жилище преукрашенное.

Радуйся, вдов и сирот благое попечение.

Радуйся, странных и обуреваемых готовое пристанище.

Радуйся, корабля святыя Церкве добрый кормчию.

Радуйся, в мори житейстем плавающым верный путеводителю.

Радуйся, в тихую пристань спасения душы человеческия направляяй.

Радуйся, заблудшыя на путь добродетели наставляяй.

Радуйся, отче Евфимие, святителю предивный.

Хотяй Христос спасения всем человеком, тя святителя преудобренна, поставляет людем своим и Церкве светильника пресветлаго, сиянми спасительных словес твоих верныя вся и просвещающа и научающа пети: Аллилуиа.

Новград Великий, стяжав в себе пастыря заступника, светло о тебе хвалится, святителю Евфимие, имея тя яко стену необоримую и столп непоколебимый; мы же чада твоя, во обители твоей живущии, к твоему заступлению усердно притекаем, молящеся и зовуще тебе:

Радуйся, святителей веселие.

Радуйся, архиереев красото.

Радуйся, монашествующих утверждение.

Радуйся, постников удобрение.

Радуйся, праведных радование.

Радуйся, грешных спасение.

Радуйся, апостолом единонравный.

Радуйся, безплотных сожителю.

Радуйся, диавольских козней разрушителю.

Радуйся, подвизающымся на невидмыя враги помощниче.

Радуйся, ангеле Божий земный.

Радуйся, человече небесный.

Радуйся, отче Евфимие, святителю предивный.

Странное Бога вочеловечение непрестанно помышляя, красоты мира сего всеконечне устранился еси, богомудре, не стяжал бо еси имети зде пребывающаго града; горняго же отечества со тщанием взыскал еси зовый: Аллилуиа.

Весь был еси в пастве твоей всем помощник, богоносне Евфимие: нищым питатель, печальным утешитель, бедствующым заступник, о всех попечение творя и всех подвизая вопити:

Радуйся, во всяких нуждах скорое вспоможение.

Радуйся, в печалех быстрое услышание.

Радуйся, немощных и убогих присный помощниче.

Радуйся, во озлоблении сущым готовейший заступниче.

Радуйся, сирых и безприютных покровителю.

Радуйся, треволнений и бурь житейских укротителю.

Радуйся, яко утопающым в пучине греховней руку помощи простираеши.

Радуйся, яко самых отчаянных из рова погибели исхищаеши.

Радуйся, имя твое святое усердно призывающым помогаяй.

Радуйся, от всяких напастей и обстояний избавляяй.

Радуйся, щедрот преизобильных подателю.

Радуйся, милости и чудес источниче.

Радуйся, отче Евфимие, святителю предивный.

Все естество ангельское удивися величию подвигов твоих, отче священнейший Евфимие: в телеси бо сый, сих поревновал еси, вся плотская взыграния умертвив; живый яко безплотен, во дни и нощи пел еси: Аллилуиа.

Ветий краснословесных преизящнейший явился еси, преподобне, паству твою непрестанно в законе Божием поучая и на путь добродетели прилежно наставляя; темже ко пристанищу спасения направи и нас, угодниче Христов, приносящих ти благохваления сицевая:

Радуйся, доброгласный органе Духа Пресвятаго.

Радуйся, сладкозвучная цевнице Иисусова.

Радуйся, наставниче преизрядный спасения.

Радуйся, кающымся пред Богом крепкое заступление.

Радуйся, душы алчущих хлебом небесным богатно напитавый.

Радуйся, жаждущих сердца Божественным веселием исполнивый.

Радуйся, яко бдением и милостынею Богови соединился еси.

Радуйся, яко добродетелми твоими Духу Пресвятому жилище явил еси.

Радуйся, Божественнаго разума преисполненный.

Радуйся, страх Божий в сердцы твоем стяжавый.

Радуйся, умом Христовым обогативыйся.

Радуйся, раноангелен в житии явивыйся.

Радуйся, отче Евфимие, святителю предивный.

Спасти хотя душу твою, о телеси твоем небрегл еси, отче наш Евфимие, сего ради и вериги тяжки до конца дней твоих на телеси тайно носил еси, от нихже многая чудеса и исцеления по смерти твоей источаеши с верою притекающым, Богу же вопиющым: Аллилуиа.

Стена еси иноческому чину и всем к тебе прибегающым: темже и нам, любовию чтущих тя и раце мощей твоих покланяющихся с верою, буди ограждение крепкое, да тобою от всех наветов вражиих избавльшеся, умильно зовем ти:

Радуйся, столпе непоколебимый Церкве Христовы.

Радуйся, твердое верных прибежище.

Радуйся, крепкое падающих возведение.

Радуйся, право стоящих утверждение.

Радуйся, согрешающих кроткий обличителю.

Радуйся, непокорных премудрый исправителю.

Радуйся, правды ревнителю неустрашимый.

Радуйся, благочестия поборниче непреоборимый.

Радуйся, не словесы точию, но паче делом и образом жития твоего всех к Богу приводяй.

Радуйся, верныя к радости духовной призываяй.

Радуйся, унывающым велие радование.

Радуйся, скорбящым душам сладкое утешение.

Радуйся, отче Евфимие, святителю предивный.

Пение всеумиленное приношаху тебе вернии твои людие по чуднем твоем отче, к Богу отшествии, с плачем велиим провождающе тя на место упокоения в любимую обитель твою; слезы многия о разлучении твоем проливаху, со воздыханием моляще и вопиюще псаломскую песнь: Аллилуиа.

Светозарная звезда явился еси, богоносне Евфимие, небо церковное украшающая и мрак демонский далече отгоняющая: темже и наша сердца омраченная грехми просвети, наставниче наш, и к свету покаяния возведи, да зовем ти:

Радуйся, свеще, божественным огнем пламенеющая.

Радуйся, заре от трисолнечнаго света.

Радуйся, пресветлейшаго священства правило.

Радуйся, лучезарное добродетельное сияние.

Радуйся, светило, мрак уныния и скорби разгоняющее.

Радуйся, деннице, верных душы и сердца просвещающая.

Радуйся, тихим светом смирения и любве нам сияяй.

Радуйся, в нощи греховней блудящым зарею покаяния возсиявый.

Радуйся, яко светлою памятию твоею нам паче солнца блистаеши.

Радуйся, со Христом пребываеши во славе.

Радуйся, яко светом небесным житие наше озаряеши.

Радуйся, трисиянныя зари наслаждаешися яве.

Радуйся, отче Евфимие, святителю предивный.

Благодатию чудес и знамений, дивно тя прослави Христос, святителю Евфимие: по шести бо надесятех днех преставления твоего, прииде посланный от первосвятителя Ионы с грамотою к тебе, и егда отверзоша раку твою обретеся честное тело твое нетленно; и грамоте, прочтенней бывшей над гробом твоим, ты, аки жив сый, в преподобнеи твои руце сию приемлеши. Людие же видевшыя сия, велми удивляхуся и прославляху Бога, дивнаго во святых Своих, поюще: Аллилуиа.

Поем твое равноангельное житие, славим твоя дивныя подвиги, почитаем досточудную кончину и со благоговением целуем твою священную раку, хвалебно зовем ти:

Радуйся, неоскудных исцелений источниче.

Радуйся, страждущих и недужных премилостивый врачу.

Радуйся, и по кончине паствы твоея не оставивый.

Радуйся, всем и коемуждо яже ко спасению у Господа испросити готовый.

Радуйся, земною нищетою небесное богатство стяжавый.

Радуйся, временною скорбию жития сего вечную радость получивый.

Радуйся, подвиг течения твоего добре совершивый на земли.

Радуйся, венцем неувядаемым увенчанный на небеси.

Радуйся, многи священныя храмы во славу святих Божиих создавый.

Радуйся, в райских селениих ликом их сочетавыйся.

Радуйся, великаго Мир Ликийских Чудотворца в житии твоем усердный чтителю.

Радуйся, в горних обителех присный его сожителю.

Радуйся, отче Евфимие, святителю предивный.

О премудрый и всехвальный архиерею чудотворче святый Евфимие! Хвалебную песнь сию приими от нас тебе усердно воспеваемую: охраняй нас молитвами твоими святыми, избавляй от всякаго злаго обстояния и скорби, да тихое житие на земли поживше, блаженство вечное наследим, и купно с тобою и всеми святыми сподобимся воспевати Богу: Аллилуиа.

Кондак сей глаголи трижды, таже Икос 1-й и Кондак 1-й

О святителю Христов Евфимие! От юности твоея Христа возлюбил еси, и благодатию Его укрепляемь, вся плотская мудрования умертвил еси, чистым житием и кротким нравом угодил еси Господеви, и по благодати Его на престоле святительства был еси, и явлися еси пастве Христовой Великаго Новаграда пастырь изряден, полагая душу твою о стаде твоем, темже пастыреначальник Христос и по смерти прослави тя подаянием чудес, от тебе истекающих, подая нам тебе образ добродетельнаго жития, и теплаго молитвенника.

Темже и аз грешный и унылый, припадая к раце мощей твоих, молюся тебе усердно: угодниче Христов, даждь ми руку помощи, воздвигни мя молитвами твоими из глубины греховныя, се бо волнами страстей плотских и уныния и иными тмочисленными житейскими треволнении обуреваяся погибаю. Буди убо мне многогрешному теплый ко Христу представтель и молитвенник, да и аз от потопления греховнаго избавлен, ко пристанищу благоутишнаго жития благодатию Христовою достигну, и чистым, на конец житием прославлю Спасителя моего, кровию Своею мене искупившаго, и тако житие скончав, получу живот вечный, в славу Отца и Сына и Святаго Духа, ныне и присно и во веки веков. Аминь.

Молитва святителю Евфимию, архиепископу Новгородскому, чудотворцу.

Отче святителю Евфимие! Ты от юности твоея Христа возлюбил еси, и, благодатию Его укрепляемь, вся плотская мудрования умертвил еси, чистым же житием и кротким нравом Господеви угодил еси, и по благодати Его на престоле святительства подвизаяся, явился еси пастве Христове Великаго Новаграда пастырь добрый, душу твою о стаде твоем полагаяй. Темже и по смерти твоей прослави тя Пастыреначальник Христос подаянием чудес, от тебе истекающих, образ добродетельнаго жития в тебе нам показуя.

Темже и аз грешный и унылый, ко святой иконе твоей припадая, молюся тебе усердно: даждь ми руку помощи, воздвигни мя молитвами твоими из глубины греховныя: се бо волнами страстей плотских и иными тьмочисленными житейскими треволнении обуреваюся и погибаю.

Буди убо мне, многогрешному, теплый ко Христу предстатель и молитвенник, да и аз, от потопления греховнаго избавлен, ко пристанищу непорочнаго жития благодатию Христовою достигну, и чистым житием прославлю Спасителя моего, кровию Своею мене искупившаго; и, тако житие скончав, получу живот вечный во Царствии Небеснем, идеже славится Пречестное и Великолепое имя Отца и Сына и Святаго Духа, ныне и присно и во веки веков. Аминь.

Тропарь святителю Евфимию

Избран быв Богови от юности, святителю Евфимие, и сего ради архиерейства саном почтен быв, упасл еси люди, иже тебе Богом врученныя; темже и по преставлении чудес дарования от Господа приял еси, исцеляти различныя недуги. Того моли о нас, совершающих честную память твою, да тебе вси непрестанно ублажаем.

Яко архиереем сопрестольник и святителем изрядный поборник был еси, святителю Евфимие, не престай сохраняя отечество твое, град же и люди, иже тебе верою почитающия и честным мощем твоим покланяющияся, да велегласно тебе вси вопием: радуйся, святителю Богомудре!

Популярные молитвы:

Молитва святому мученику Виту Римскому

Молитва святым мученикам Хрисанфу и Дарии

Молитва святому мученику Неофиту

Молитвы Великомученику Иоанну Новому, Сочавскому

Молитва святому апостолу Филиппу

Молитва первомученице равноапостольной Фекле

Молитвы Пресвятой Богородице Почаевская

Молитва святителю Стефану, епископу Пермскому

Молитвы преподобному Антонию Великому

Молитва Архангелу Уриилу

Молитва Пресвятой Богородице Владимирская

Молитва Святому преподобному Паисию Великому

Молитва преподобномученице Евдокии

Псалмы на разные случаи. Псалом

Православные информеры для сайтов и блогов

Все молитвы .

Молитвы на всякую потребу

Молитвы в борьбе с плотской страстью

Молитва Макария Оптинского

О Мати Господа, моего Творца, Ты корень девства и неувядаемый цвет чистоты. О Богородительнице! Ты ми помози, немощному плотскою страстию и болезненну сущу, едино бо Твое и Тобою Твоего Сына и Бога имею заступление. Аминь.

Преподобному Виталию

(Виталий занимался обращением блудниц.)

О священная главо, преподобне отче, преблаженне авво Виталие, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.

Тропарь преподобному, глас 8

В тебе, отче, известно спасеся еже по образу приим бо крест последовал еси Христу, и дея учил еси презирати убо плоть, приходит бо: прилежати же о души, вещи безсмертней: тем же и со Ангелы срадуется, преподобне Виталие, дух твой.

Кондак преподобному, глас 2

Чистотою душевною Божественно вооружився, и непристанныя молитвы яко копие вручив крепко, пробол еси бесовская ополчения Виталие, моли непрестанно о всех нас.

Величание преподобному

Ублажаем тя, преподобне отче Виталие, и чтем святую память твою, наставниче монахов и собеседниче Ангелов.

Преподобному Мартиниану Кесарийскому

(Когда блудница под видом странницы пришла к Мартиниану, он стоял на раскаленных углях, пока не погасла в нем плотская похоть. Чтобы избежать соблазна женского, он странствовал из места в место.)

Кондак, глас 2

Яко подвижников благочестия искусна, и страдальца произволением честнаго, и пустыни жителя и всельника, в песнех достойно восхвалим Мартиниана присночестнаго: той бо змия попра.

От конец даже до конец пройде вещание красных добродетелей и Божественных подвиг твоих: млад сый возрастом, в пустынях возжелал еси пожити, пения Христу, псалмы и молитвы воспущая присно: день же и нощь возрастая в болезнех и слезах, чисте житие твое скончал еси и, мудре, злоночальнаго посрамил еси, ты бо змия попрал еси.

Святителю Евфимию Новгородскому, чудотворцу

(Евфимий обладал благодатным даром избавлять от плотской страсти.)

Молитва святителю Евфимию, архиепископу Новгородскому

Отче святителю Евфимие! Ты от юности Твоея Христа возлюбил еси, и благодатию Его укрепляем, вся плотская мудрования умертвил еси, чистым же житием и кротким нравом Господеви угодил еси, и по благодати Его на престоле святительства подвизаяся, явился еси, пастве Христове Великаго Новограда пастырь добрый, душу твою о стаде твоем полагаяй. Темже и по смерти твоей прослави тя Пастыреначальник Христос подаянием чудес, от тебя истекающих, образ добродетельнаго жития в тебе нам показуя. Темже и аз грешный и унылый, к раце мощей твоих припадая, молюся тебе усердно: даждь ми руку помощи, воздвигни мя молитвами твоими из глубины греховныя: се бо волнами страстей плотских и иными тьмочисленными житейскими треволнении обуреваюся. Буди убо мне многогрешному теплый ко Христу предстатель и молитвенник, да и аз, от потопления греховнаго избавлен, ко пристанищу непорочнаго жития благодатию Христовою достигну, и чистым житием прославлю Спасителя моего, кровию Своею мене искупившаго: и тако жития скончав, получу жизнь вечную во Царствии Небеснем, идеже славится Пречестное и Великолепое Имя Отца, и Сына, и Святаго Духа, ныне и присно и вовеки веков. Аминь.

Мученице Фомаиде Египетской

("Клади шесть недель по сту поклонов на день, отпой шесть молебнов мученице Фомаиде ради избавления от блудной страсти".)

О, всехвальная мученице Фомаидо! За чистоту супружества даже до крове подвизавшися и целомудрия ради душу свою положивши, достойна пред Господем обрелася еси, во еже в лице преподобных дев почтенней тебе быти. Услыши нас, молящихся тебе, и якоже древле боримии от плоти целительницу тя имеяху, по дарованней Тебе от Бога благодати, сице и ныне прибегающим ко предстательству твоему подаждь отраду и освобождение от плотския брани, и целомудренное житие, и незазорное в супружестве и девстве пребывание твоими благоприятными молитвами всем исходатайствовати потщися, яко да телеса наша храм живущаго в нас Святаго Духа будут. О преизбранная в женах и верная рабо Христова! Помози нам, да не погибнем со страстьми и похотьми нашими, но да управимся умом нашим и укрепимся сердцем нашим во всяком благочестии и чистоте, славяще твою помощь и предстательство, благодать же и милость Триединаго Бога, Отца и Сына и Святаго Духа во веки веков. Аминь.

Преподобной Таисии

(Таисия была весьма прекрасна и прославилась повсюду красотою своего лица. Прельщая поклонников своих, она доводила их до разорения, нищеты, ссор из-за нее. После беседы с преподобным Пафнутием, Таисия пребывала три года в затворе в женском монастыре, замаливая свой грех блуда, пока видение Павлу Препростому не объяснило, что грех бывшей блудницы Таисии прощен.)

Тропарь преподобной, глас 8

В тебе, мати, известно спасеся еже по образу: приимши бо крест последовала еси Христу, и дающи учила еси презирати убо плоть, преходит бо: прилежати же о душе, вещи безсмертней: темже и со Ангелы срадуется, преподобная Таисие, дух твой.

Кондак, глас 2

За любовь Господню, преподобная, покоя желание возненавидела еси, пощением дух твой просветивши: крепко бо звери победила еси: но молитвами твоими противных шатание разори.

Оценка 4.1 проголосовавших: 11
ПОДЕЛИТЬСЯ

ОСТАВЬТЕ ОТВЕТ

Please enter your comment!
Please enter your name here